Нови податоци од грчката мрежа за рано предупредување ELNAIS откриваат алармантно ширење на опасната сребренообразна крастава жаба, попозната како „риба зајак“, низ грчките води. Интерактивната мапа на мрежата покажува дека инвазивниот вид, кој пред две децении бил забележан само на неколку локации, денес е присутен речиси во целиот источен дел на Егејското Море, околу Крит, Додеканезите и Кикладите.
Научно позната како Lagocephalus sceleratus, оваа високо токсична риба во Медитеранот навлегла преку Суецки Канал, по што почнала брзо да се размножува и да формира бројни популации.
Научниците предупредуваат дека станува збор за еден од најопасните инвазивни видови во Медитеранот. Освен што сериозно го нарушува морскиот екосистем и го загрозува автохтониот морски свет, рибата предизвикува значителни штети и на рибарството, оштетувајќи мрежи и уништувајќи го уловот.
Дополнителна опасност претставува и нејзината токсичност. Месото на оваа риба содржи силен невротоксин кој може да биде смртоносен доколку се консумира, поради што властите постојано апелираат граѓаните и рибарите да не ја користат за исхрана.
Според податоците на ELNAIS, ширењето на „рибата зајак“ е континуирано во последните дваесет години. Од првични изолирани појави, денес таа е широко распространета низ источниот Медитеран, со најголема концентрација околу Крит и во поголемиот дел од Егејското Море.
Грчките рибари сè почесто пријавуваат улови на овој вид, а надлежните институции воведуваат дополнителни мерки за следење и намалување на неговата популација. Слични програми за пронаоѓање и отстранување на инвазивната риба веќе се спроведуваат во Грција, Кипар и други земји од источниот Медитеран, со цел да се забави нејзиното понатамошно ширење.
Интерактивната мапа на ELNAIS претставува досега еден од најјасните прикази за брзината со која овој опасен морски предатор ја менува сликата на источниот Медитеран, создавајќи сè поголем предизвик за биодиверзитетот, рибарството и крајбрежните заедници.
