Две лица се убиени во раните утрински часови во експлозија пред железничка станица во Москва, соопшти локалната полиција.
Московската полиција соопшти дека околу 00:05 часот по локално време, непознато лице се приближило до патролно возило на сообраќајна полиција на плоштадот пред Савеловската станица во центарот на Москва, по што следела детонација на неутврдена експлозивна направа.
При експлозијата загинале напаѓачот и еден полициски службеник, а уште двајца се ранети. Патролното возило е уништено до непрепознатливост од експлозивниот бран, но не се запалило.
На местото на настанот пристигнале службеници на рускиот Истражен комитет и возила на брза помош. Плоштадот пред станицата е опколен од полиција, а сообраќајот на градскиот превоз во тој реон е запрен, јавија локалните медиуми.
Покрената е кривична постапка за напад врз животот на службеник на органите за спроведување на законот и за поседување експлозивна направа.
