Министерството за одбрана на САД им нареди на околу 1.500 активни припадници на вооружените сили да се подготват за евентуално распоредување во сојузната држава Минесота, објави „Вашингтон пост“, повикувајќи се на претставници од одбраната.
Војската ги стави единиците во состојба на готовност во случај насилството во државата да ескалира, според извештај на „Вашингтон пост“. Овој потег дојде откако американскиот претседател Доналд Трамп се закани дека ќе го активира Законот за бунт доколку државните претставници не ги спречат демонстрантите да напаѓаат агенти на Службата за имиграција и царина (ICE).
„Ако корумпираните политичари во Минесота не го почитуваат законот и не ги спречат професионалните агитатори и бунтовници да напаѓаат патриоти на ICE кои само се обидуваат да си ја работат работата, ќе го активирам СЕРИОЗНИОТ ЗАКОН“, напиша Трамп на својата социјална мрежа во четврток.
Ниту Пентагон ниту Белата куќа не одговорија веднаш на барањето за коментар.
Министерството за правда на САД отвори кривична истрага против функционери на Минесота, вклучувајќи ги гувернерот Тим Волц и градоначалникот на Минеаполис Џејкоб Фреј, за наводен заговор за попречување на имиграциските агенти, изјави во петокот извор запознаен со истрагата.
Изворот, кој зборуваше под услов да остане анонимен, рече дека за Волц и Фреј биле подготвени судски покани како дел од истрагата, но не беше веднаш јасно дали им биле доставени.
Истрагата, за која првпат објави CBS News, произлегува од изјавите на Волц и Фреј за илјадниците агенти на имиграциската и царинската служба и граничната патрола распоредени во областа на Минеаполис во последните недели по налог на претседателот Доналд Трамп, рече изворот.
Администрацијата на Трамп испрати речиси 3.000 федерални агенти во Минесота од почетокот на минатата недела, предизвикувајќи лути протести во Минеаполис поради зголемувањето на бројот на имиграциски агенти на улиците на најнаселениот град во државата. Судирите меѓу жителите и федералните службеници станаа сè потензични откако агент на ICE ја застрела американската државјанка Рене Гуд (37) зад воланот на нејзиниот автомобил во Минеаполис на 7 јануари, предизвикувајќи дневни протести кои се проширија и во други градови.
Иако ги повика демонстрантите да останат смирени, Волц, исто така, ги охрабри граѓаните да снимаат со видео сите апсења или други средби меѓу агентите на ICE и јавноста за да создадат база на податоци за потенцијално „идно гонење“ на злоупотреби од страна на полицијата.
Волц и Фреј постојано бараат Трамп да го прекине распоредувањето на ICE, велејќи дека милитаризираната депортација е неодговорна операција насочена кон сеење хаос, страв и наслови и ги става цивилите во опасност.
Заменик-јавниот обвинител на САД, Тод Бланш, претходно оваа недела, ги обвини Волц и Фреј за судирите и рече дека е фокусиран на нивно запирање „со сите потребни средства“.
