Поп-иконата Мадона јавно застана зад народот на Иран, упатувајќи порака на поддршка и солидарност во време на масовни протести и репресии. Во објава на Инстаграм, 67-годишната пејачка сподели видео на кое јава коњ низ пустината во Мароко, правејќи паралела меѓу сопствената слобода и борбата на Иранците. Таа е меѓу ретките светски ѕвезди кои отворено ги поддржуваат демонстрантите во Иран.
„Држете се цврсто… Не можам да смислам порелевантна фраза од оваа додека влегуваме во Годината на Огнениот коњ! Додека размислувам за моето време во Мароко за време на празниците, мислам на сите луѓе во Иран кои се борат во многу потребната револуција и се подготвени да умрат за она во што веруваат“, напиша Мадона.
Таа истакна дека многу слободи што луѓето на Запад ги земаат здраво за готово – патувањето, облекувањето, слободниот говор и изборот на сопствен пат им се ускратени на жените во Иран.
„Слободата да патувам низ светот. Да носам што сакам. Да јавам коњ низ пустината. Да зборувам слободно и да не бидам замолчена од казни, тортура и можна смрт. Да пеам. Да танцувам. Да го изберам својот духовен пат, а не туѓиот… Жените во Иран немаат таа слобода. Јас сум со нив“, порача таа.
Во завршницата на пораката, Мадона нагласи дека иранскиот народ со векови живее без вистинска слобода и дека, иако не може целосно да го почувствува нивното страдање, нејзините мисли и молитви се со нив.
„Времето е сега. Држете се цврсто! Јас сум со Иран. Нека се чујат нивните гласови… СЛОБОДЕН ИРАН!“, напиша таа.
Протестите во Иран започнаа кон крајот на декември 2025 година поради економската криза и наглиот пад на вредноста на валутата, а се проширија во повеќе од 180 градови. По исклучувањето на интернетот на 8 јануари, иранските власти започнаа жестока репресија, при што безбедносните сили употребија екстремно насилство за задушување на демонстрациите.
