Повеќе од 1.500 возила украдени во Канада се откриени ширум светот откако канадската полиција успешно ги интегрираше податоците од нивните украдени возила со базата на податоци за автомобили по кои се трага на Интерпол.
Канадската полиција има информации за околу 150.000 возила украдени во таа земја. Од интеграцијата со информациите на Интерпол, секоја недела се идентификувани повеќе од 200 украдени возила. Информациите добиени на овој начин се проверуваат од органите за спроведување на законот ширум светот, обично на националните влезни пристаништа.
Канада е рангирана меѓу првите 10 земји по бројот на украдени автомобили.
„Украдените возила се меѓународна криминална валута. Тие не се користат само за трговија со дрога, туку и за плаќање на други криминални мрежи, како и за поттикнување активности кои се движат од трговија со луѓе до тероризам“, рече генералниот секретар на Интерпол, Јирген Сток.
Тој посочува дека понекогаш се занемарува дека украдениот автомобил не е само кражба на возило. Тоа е дел од главниот прилив на приходи што го финансира транснационалниот организиран криминал.
„Преку зголемено споделување податоци на глобално ниво, можеме подобро да ги прегледаме возилата на граничните точки, да ги идентификуваме патиштата за трговија со луѓе и да ги апсиме сторителите“, заклучи Сток.
Базата на податоци на Интерпол им овозможува на полицијата во земјите членки на оваа организација да провери сомнително возило и веднаш да открие дали има пријава за кражба.
Во 2023 година, околу 226.000 возила беа идентификувани како украдени ширум светот преку оваа база на податоци. Во последниве години, Канада се појави како клучен извор на украдени моторни возила, делумно поради големата понуда на барани модели со висока вредност. Многу возила се испраќаат на Блискиот Исток и Западна Африка, каде потоа се препродаваат.
Канадската влада во февруари објави дека Заедничкиот транснационален проект за криминал со возила на Интерпол ќе добие 3,5 милиони долари (2,4 милиони евра) за подобрување на размената на информации и истражните тактики за идентификување и враќање на украдените возила и делови ширум светот.
Интерпол потсетува дека во 2022 година операцијата под кодното име „Carbek“ била спроведена во 77 земји и резултатот е пронаоѓање на стотици автомобили, камиони и мотоцикли за само две недели.
