Реакциите на пиење алкохол може да бидат различни, а многу луѓе имаат непријатен мамурлак и главоболка еден ден подоцна откако ќе испијат премногу чаши. Сепак, одредени луѓе може да имаат посилни и потешки реакции на алкохол, што исто така може да укажува на алергиска реакција. Докторката Ема Канингем ги издвои најчестите показатели и предупредувачки знаци на кожата кои укажуваат на можна алергија на алкохол.
„Некои поединци може да бидат алергични или нетолерантни на одредени состојки кои се наоѓаат во алкохолните пијалоци, што може да се манифестира преку кожни реакции“, посочува докторката.
Црвенило на кожата
Докторката тврди дека „алкохолот може да предизвика проширување на крвните садови, што доведува до црвенило на кожата, особено на лицето и вратот“. Оваа реакција е почеста кај луѓето со нетолеранција на алкохол, а е резултат на генетски недостаток на ензимот наречен алдехид дехидрогеназа 2 (ALDH2)“, пишува Express.
Недостатокот на овој ензим предизвикува телото помалку ефикасно да го метаболизира алкохолот, што доведува до ослободување на хистамин што предизвикува црвенило, истакнува Канингам.
Осип
Алергиската реакција на алкохол може да изгледа како онаа од коприва или уртикарија. Овој осип, кој изгледа како црвени плускавци на кожата, може да биде со различни форми и големини.
Според докторката, реакцијата „често е предизвикана од имунолошки одговор на одредени состојки во алкохолните пијалоци, како што се житарките, квасецот или сулфитите“.
Чешање
Алергијата или нетолеранцијата на алкохол може да предизвика и општо чешање кое може да се појави веднаш по пиењето алкохол или постепено да се развива со текот на времето, пренесува Express. Канингам објаснува дека „чешањето може да биде локално или да зафати поголеми делови од телото“.
Оток
Во некои потешки случаи, алергиската реакција на алкохол може да доведе до отекување на усните, јазикот, лицето или грлото. Лекарката посочува дека овој случај е познат како ангиоедем и може да биде сериозна алергиска реакција која бара итна медицинска помош. Во овие случаи, важно е да останете многу смирени и да отидете во најблиската болница што за да може реакцијата да се третира што е можно поскоро.
