По големата дводневна потрага по легендарното чудовиште Неси во август минатата година, која не ги даде посакуваните резултати, шкотскиот центар „Лох Нес“ неодамна се обрати за помош до научниците ширум светот, како и до Американската вселенска агенција. Идејата, како што објасни Ејми Тод од споменатиот центар, е да се вклучат експерти на НАСА во истражување на подводниот терен со цел да се најде некаква трага од чудовиште за кое се шпекулира дека живее во шкотско езеро со векови.
„Веруваме дека експертите на НАСА со помош на напредна технологија можат да го скенираат целото езеро за да утврдат дали Неси навистина живее овде“, објасни Ејми Тод, а пренесе Би-би-си.
Информациите за чудовиштето од Лох Нес датираат од античко време. Постојат камени резби кои прикажуваат воден ѕвер со перки и долг врат, кои датираат од п.н.е. Во записите од седмиот век се споменува дека Неси ги напаѓала луѓето кои се наоѓале на езерото, а во подоцнежен период имало и записи за нејзино видување во езерото. До крајот не е јасно дали Неси е само мит или навистина постои.
Помеѓу двете светски војни во минатиот век, легендата за чудовиштето почна драстично да се шири. Кога патот крај езерото бил завршен во 1933 година, еден пар пријавил дека видел огромно животно, истакнувајќи дека личи на змеј или праисториско чудовиште. Приказната за овој инцидент беше објавена во еден шкотски весник, по што следеа бројни извештаи за видување на Неси во езерото. Беа организирани многубројни потраги, но не дадоа резултат. Различни истраги покажаа дека некои од извештаите биле лажни. Во децениите што следеа, јавноста беше поделена – многумина веруваа дека Неси постои и шета по споменатото езеро секогаш кога ќе и се допадне, додека други инсистираа на тоа дека нема чудовиште и објаснуваа повремени видувања на непознат ѕвер на површината на водата во различни начини.
