Соединетите Американски Држави (САД) привремено го суспендираа финансирањето на агенцијата на Обединетите нации за палестински бегалци (UNRWA) по обвинувањата дека персоналот на агенцијата бил вмешан во нападот на Хамас врз Израел на 7 октомври, пренесува МИНА.
УНРВА е главната агенција која обезбедува помош за жителите на Газа во пресрет на хуманитарната катастрофа предизвикана од израелската офанзива против Хамас во Газа по нападот на 7 октомври.
Претставниците на УНРВА не коментираа како на нејзината работа ќе влијае одлуката на САД да го прекине финансирањето.
Шефот на УНРВА, Филипе Лазарини, рече дека ги раскинал договорите со неколку вработени и наредил истрага откако Израел излезе со информации дека тие имале улога во нападот.
Американскиот Стејт департмент соопшти дека има обвиненија против 12 вработени.
Во изјавата Лазарини наведе дека обвинувањата се „шокантни“ и рече дека секој вработен „вклучен во терористички акти ќе одговара, што вклучува и кривично гонење“.
Тој не прецизираше каква е наводната улога на персоналот на агенцијата во нападот во кој членови на Хамас го нападнаа јужниот дел на Израел и убија околу 1.200 луѓе и киднапираа околу 250.
