Поради укинувањето на визите Косово ќе остане без 150.000 работници

Претседателот на Самостојниот синдикат на приватниот сектор на Косово, Јусуф Аземи денеска изјави дека поради либерализацијата на визниот режим Косово годинава ќе остане без 150.000 работници, пренесуваат медиумите.

Аземи рече дека либерализацијата на визниот режим ќе се одрази и на приватниот сектор и додаде дека сопствениците на различни компании во првата половина од годинава имаат своевиден тест, односно последна шанса да обезбедат подобри услови за работа пред работната сила да го напушта Косово.

„И сега е забележлив недостиг од работници и очекувам во вториот дел од оваа година да имаме поголем број на луѓе кои ќе го напуштат Косово, под услов да најдат работа со подобри услови. Сопствениците на бизниси ги имаат првите шест месеци од оваа година како еден вид тест барем да понудиме услови кои го исполнуваат законот за работни односи и колективниот договор“, изјави Аземи за приштинските медиуми.

Според него, минималната плата во Косово треба да биде 500 евра.

„Знаеме дека има недостиг на работна сила насекаде во светот, но во Косово е многу сериозно што толку многу работници заминуваат, бидејќи имаме мала популација. Се надевам дека овие бројки можеби не се точни, но се плашам дека оваа година ќе имаме меѓу 100.000 и 140.000 работници помалку од претходните години“, рече тој.

Од 1 јануари 2024 година, граѓаните на Косово можат без визи да патуваат во 27 земји од Шенген зоната.

Либерализацијата на визите им овозможува на граѓаните на Косово, кои имаат биометриски пасоши, да престојуваат до 90 дена, во период од шест месеци, во која било од 27-те земји членки на Шенген зоната.

Треба да знаете
Последни објави