Руското Министерство за надворешни работи денеска соопшти дека во разговор со претставници на палестинското движење Хамас во Москва се разговарало за ослободување на заложниците и евакуација на Русите од Појасот Газа.
Во соопштението се наведува дека на разговорите во Москва бил и членот на Политбирото на Хамас, Абу Марзук, кому му било кажано дека Русија е за итно ослободување на странските заложници во Појасот Газа, пренесува Тас.
Министерството за надворешни работи на Русија соопшти дека e потврдена „непроменливата позиција на Русија во корист на спроведувањето на познатите одлуки на меѓународната заедница, вклучително и релевантните резолуции на Советот за безбедност и Генералното собрание на ОН, кои предвидуваат создавање на суверена палестинска држава во границите од 1967 година, со главен град во источен Ерусалим“.