Околу 10.000 луѓе се собраа денеска во центарот на Атина за да покажат солидарност со Палестинците пред да се упатат кон израелската амбасада.
Вториот собир за поддршка на Израел, прв таков собир во Грција по нападот на палестинскиот Хамас врз Израел на 7 октомври, се одржа малку порано пред истата амбасада, а на него се собраа околу стотина луѓе.
Здружението за пријателство меѓу Израел и Грција ги повика учесниците преку Фејсбук да покажат солидарност и да побараат правда за илјадниците невини луѓе кои беа убиени и итно ослободување на заложниците киднапирани од Хамас.
Грчките левичарски партии и медиуми зазедоа попропалестински став и ја критикуваа, како што ја нарекоа, долгорочната „окупација“ на Палестина, обвинувајќи ги ЕУ и САД за нивната безусловна поддршка за Израел.
Грчкиот премиер Киријакос Мицотакис денеска изјави дека Израел „претрпел дивјачки терористички напад досега невиден на Блискиот Исток“.
Но додаде дека Грција прави јасна разлика меѓу Хамас и палестинскиот народ.
„Израел мора да го почитува меѓународното право и да дејствува во согласност со правилата за вооружен конфликт“, изјави Мицотакис за телевизијата АНТ1. Грчкиот премиер го изрази и својот ужас по нападот на болницата во Газа во кој загинаа стотици луѓе.
