Заменик генералниот секретар на НАТО, Мирчеа Џоана денеска изјави дека оваа година била тешка за регионот на Западен Балкан.
„Годината зад нас за овој регион е тешка, се уште се соочуваме со зголемени тензии“, рече Џоана на форумот To be Secure во Будва.
Тој потсети на нападот врз патролата на косовската полиција, во кој загина еден полицаец, а неколку лица беа повредени.
„Ова мора да престане. КФОР внимателно ја следи ситуацијата на терен и ние сме подготвени да дејствуваме. Неутралноста и непристрасноста се од клучно значење за успехот на нашите мисии“, рече Џоана.
НАТО, како што наведе, силно го поддржува дијалогот меѓу Белград и Приштина, кој го води Европската Унија.
„Останатите прашања можат да се решат само со политички договор, затоа се неопходни верба, трпение, истрајност и компромис. Време е за деескалација“, истакна Џоана.
Тој рече дека, во исто време, во Босна и Херцеговина реториката на сепаратизам предизвикува загриженост. НАТО, како што рече Јоана, силно го поддржува суверенитетот и територијалниот интегритет на Босна и Херцеговина и напорите за евроатлански реформи.
Според него, тоа се однесува на целиот Западен Балкан.
„Ова се тешки времиња, нашите вредности – слободата, демократијата, владеењето на правото се на удар, не само на Западен Балкан, туку и надвор од тој регион“, рече Џоана.
Според него, најочигледна демонстрација за тоа е руската агресија врз Украина.
