Министерот за надворешни работи на Австрија, Александар Шаленберг и министерката за европски прашања Каролин Едштадлер сакаат да промовираат побрза интеграција на земјите од Западен Балкан во ЕУ и за таа цел напишаа писмо и „нон пејпер“ до високиот претставник за надворешни работи и безбедност на ЕУ, Жозеп Борел и до комесарот за проширување Оливер Вархељ во кои презентираа конкретни предлози.
Во „нон-пејперот“ се наведени предлозите што беа претставени во мај 2022 година, пренесува австрискиот јавен радиодифузер OРФ.
Од гледна точка на двајцата австриски министри, ова има за цел да го забрза стагнантниот процес на проширување на ЕУ. Во своето писмо, Шаленберг и Едштадлер ја повикуваат ЕУ да има „јасен план за побрза интеграција до 2024 година и понатаму“.
Според нацрт-документот, акцискиот план треба да обезбеди конкретни чекори за спроведување на постепената интеграција на земјите од Западен Балкан до 2024 година и потоа.
Финансиската поддршка има за цел да стане поефикасна преку подобрен систем на стимулации моделирани според плановите за реконструкција и отпорност. Згора на тоа, земјите од Западен Балкан треба редовно да бидат поканети да учествуваат неформално на состаноците на Советот на ЕУ.
ОРФ наведува и дека проширувањето на ЕУ е високо на агендата на неформалниот самит на шефови на држави и влади на ЕУ следната недела.
Во австрискиот „нон-пејпер“ напишан во мај минатата година, како активирач беше земена војната во Украина, односно опасноста што доаѓа од Русија.
Во воведот на документот се вели дека конфликтот во Украина ја променил геополитичката ситуација, ја загрозил политиката на Европската унија „Источно соседство“ и може да има негативни последици за стабилноста на Западен Балкан.
„Ние сакаме и ни требаат земјите од овој регион на наша страна. Тие се клучен партнер и составен дел од нашето европско семејство. Поради оваа причина, мораме да го преиспитаме нашиот пристап кон процесот на проширување и нашата соседска политика.
Европската унија не може да си дозволи да му даде приоритет на членството на Украина, игнорирајќи ги другите долгогодишни кандидатури како оние од Западен Балкан, предупреди австрискиот министер за надворешни работи Александар Шаленберг претходно овој месец.
