Собранието денеска, во 12 часот, ќе ја продолжи расправата по 91-вата седница, на чии дневен ред е и Извештај на Европската комисија за Република Северна Македонија за 2022 година. На дневен ред се и неколку предлог-ратификации, потоа предлог-финансиски планови на Регулаторната комисија за енергетика и на МРТ за 2023 година.
Една од точките по кои треба да расправаат пратениците е и Предлог на закон за изменување и дополнување на Законот за аудио и аудиовизуелни медиумски услуги, по скратена постапка и Предлог на закон за прогласување на Студенчишко Блато за Парк на природата, во прво читање.
Во Собранието во 10 часот е предвидена проштална средба на полскиот амбасадор Војциех Тицињски со претседателот Талат Џафери.
Во посета на Парламентот се очекува и Делегација од израелскиот Кнесет, која во 14:30 часот ќе се сретне со претседателот Џафери, а во 15:20 часот со пратеничката Рашела Мизрахи, претседател на пратеничка група на Собранието на Република Северна Македонија за соработка со Парламентот на државата Израел и членовите.
