Над 56 проценти од жителите на Скопје користат сопствен автомобил како основно средство за превоз, што го става нашиот главен град во друштво на Никозија, Рига и Валета, објави „24Ауто.мк“.
Според податоците на Евростат за транспортот што најчесто го користат луѓето од главните градови во Европа, во 2015 година 91 процент од жителите на Никозија, 68 проценти на Рига и Валета и 67 проценти од жителите во Луксембург користеле автомобили.
Од друга страна, пак, 80 проценти од жителите на Париз и 73 проценти од жителите на Виена користеле јавен транспорт, додека 58 проценти од жителите на Копенхаген и 53 проценти од жителите на Амстердам користеле велосипеди.
Според анкетата спроведена на граѓаните од град Скопје, 56,65 проценти користат сопствени автомобили како основно средство за превоз до секојдневните дестинации.
Како што e објавено во билтенот на веб-страницата на Град Скопје – zivotnasredina.skopje.gov.mk, како резултат на возењето во такви услови на голем сообраќаен метеж, согорувањето на горивата е поголемо и на тој начин драстично се зголемува создавањето на стакленички гасови меѓу кои е и CО2.
Според податоците на Евростат најмногу возила на 1.000 жители има Луксембург – 670 и Италија – 625, додека најмалку возила имаат Бугарија – 393 и Хрватска – 389. Во нашата земја има 200 регистрирани возила на 1.000 жители, што не става меѓу најслабо моторизираните земји во регионот.
