Коалицијата „Алијанса за Албанците и Алтернатива“ денешниот протест кој заврши пред канцелариите на ЕУ побара од земјите на Европската Унија да се осуди злоупотребата на правото на глас и да не се признае легитимноста на ДУИ како претставник на Албанците во Северна Македонија и со помош на ЕУ да се почне процесот на радикална реформа на Изборниот законик, така што, како што велат, идните избори да станат пример дека нашата земја ги исполнува европските стандарди за фер и демократски избори.
Двете партии соопштија дека за нив ДУИ не е победник на изборите, туку е арамија на албанската политичка волја.
„За нас, Демократската унија за интеграција не е победник на овие избори, туку е арамија на албанската политичка волја и следствено на тоа може да ја има легалноста според Државната изборна комисија, но никогаш нема да има легитимност за застапување на албанскиот народ во Северна Македонија“, порачаа организаторите на маршот.
-Нашата борба за демократија ќе продолжи и нема да запре сè додека не се постигне целосна демократија во албанскиот политички камп. Веќе имаме 12 пратеници, кои, без оглед дали ќе бидат дел од мнозинството или не, ќе бидат гласот на Албанците за демократија и нема да дозволиме ништо друго да ја замени демократијата во нашата земја. Ако сме земја која има цел европска интеграција, слободата и демократијата треба да бидат клучен збор за оваа интеграција“, велат од партиите.
Фото: Слободан Ѓуриќ
