Парламентарното собрание на Советот на Европа (ПССЕ) на зимската пленарна сесија ја потврди обврската на земјите-членки „да гарантираат недискриминација на работното место, заснована врз религијата и верувањата, јави дописникот на МИА од Стразбур.
Со усвојување на резолуцијата, заснована врз извештајот на Давор Иво Стиер (Хрватска, ЕПП / ЦД), ПССЕ ги повика земјите членки да „промовираат култура на толеранција и заедничко живеење во општество со религиозен плурализам” , истовремено осигурувајќи дека се почитува правото на слобода на мислата, совеста и религијата.
ПССЕ притоа ги повика државите да преземат законодавна постапка за да „вработените да можат да пријават нарушување на нивното право на недискриминација врз основа на религијата или верувањата” и да воспостават механизми за доставување на поплаки. Парламентарците од 47-те земји членки на Советот на Европа, притоа нагласија дека обезбедувањето недискриминација на вработените врз основа на нивната религија или верување е „од круцијално значење”.
