Италија соопшти во средата дека ќе им дозволи 116 мигранти заробени со денови на пристаништето на Сицилија да го напуштат италијанскиот брод, со што ќе стави крај на своето последно несогласување со Европската унија околу нејзината миграциската политика.
Вицепремиерот Матео Салвини изјави дека постигнал договор со ЕУ, Германија, Франција, Португалија, Луксембург и Ирска да ги преземат барателите на азил кои беа спасени на море минатата недела.
Бродот на крајбрежната стража „Бруно Грегорети“ минатиот викенд доби дозвола да се прикотви, но не и да замине од сицилијанското пристаниште „Августа“. Властите на Сицилија отворија истрага за благосостојбата на мигрантите на бродот, а медицинскиот персонал на кого му беше дозволено да го посети бродот откри дека 116те лица на бродот морале да делат еден тоалет.
Додека на децата им беше дозволено да заминат на почетокот од оваа недела, италијанскиот министер за внатрешни работи Матео Салвини одби да им дозволи на другите да го напуштат бродот сè додека другите европски земји не понудија да ги примат азилантите.
„Италијанските власти го кршат меѓународното право, во кое се вели дека спасувањето завршува кога спасените лица ќе ги напуштат бродот на безбедно пристаниште“, изјави Елиза де Пиери, истражувач во „Амнести Интернешнел“, пред Италија да го објави крајот на застојот.
Салвини ги отфрли критиките на социјалните медиуми, велејќи дека во ситуација кога милиони Италијани бараат работа, негова должност е да го ограничи бројот на мигранти во земјата.
