Извршната власт на Франција ќе мора да се докаже, покажуваат резултатите од испитувањето на јавното мислење, спроведено од институтот Харис Интерактив за потребите на телевизијата М6 и радиото РТЛ.
Според анкетата, само една третина од Французите веруваат во способноста на извршната власт да „дејствува во вистинска насока” за идните реформи, јави дописникот на МИА.
Триесет и три проценти од испитаниците сметаат дека извршната власт е способна да дејствува во вистинската насока за реформата на институциите, 32 отсто за здравственото осигурување и 29 проценти за пензиите.
Две третини од Французците (67 отсто) сметаат дека Владата мора „пред се да ја поттикне куповната моќ на граѓаните”, па дури и ако не се справи со долгот и дефицитот на Франција, додека 27 проценти од испитаниците веруваат дека контролата на долгот и дефицитот треба да бидат приоритет.
Помалку од една половина од анкетираните (47 проценти) одговориле дека се „оптимисти” за новата година, наспроти 51 отсто „песимисти”.
