Двајца поранешни француски полицајци беа осудени на по седум години затвор за силување канадска туристка во поранешниот штаб на полицијата во Париз.
Во четвртокот парискиот суд ги осуди Антоан Квирин и Николас Редуан за силување на туристката во април 2014 година. Двајцата мажи негираа дека ја силувале 39-годишната Емили Спантон тврдејќи дека таа се согласила да има сексуални односи со нив кога тројцата биле под дејство на алкохол.
Спантон тврди дека во април 2014 година таа ги запознала двајцата мажи во еден ирски паб по што тие ја поканиле на разгледување на познатата полициската станица. Таа исто така тврди и дека таму тие ја принудиле да пие виски по што ја силувале.
Судот бил убеден во вистинитоста на нејзиното тврдење поради конзистентноста на нејзините изјави и научните и техничките елементи, како примероците од ДНК и анализата на телефонските разговори.
„Вечерта на 22 април 2014 година обвинетите не беа полицајци, туку узурпатори недостојни за нивните значки, кои се однесуваа исто како и оние што ги гонат. Таа вечер тие прејдоа на лошата страна“, изјави пред судот адвокатот на обвинителството, Филип Курој.
Според него, исказот на полицајците содржел јасни елементи на прикривање и очигледни недоследности.
