Владата на Република Македонија во рамки на 115-та седница денеска донесе повеќе одлуки меѓу кои и за Законот за борба против корупцијата за кој се предлага да оди по скратена постапка во Парламентот, а утврден е и новиот текст на Предлог – законот за слободен пристап до информации од јавен карактер.
-Владата на Република Македонија на својата денешна 115-та редовна седница донесе одлука на Собранието на РМ да му предложи Предлог-законот за спречување на корупцијата и судирот на интереси да се донесе по скратена постапка и со европско знаменце за да се донесе колку што е можно побргу со цел зајакнување на ефикасноста и независноста на Државната комисија за спречување на корупцијата и зајакнување на правната и институционална антикорупциска рамка за поефикасна превенција и борба против корупцијата, стои во соопштението од владината прес-служба.
На денешната седница на Владата беше разгледан и утврден новиот текст на Предлог – законот за слободен пристап до информации од јавен карактер и донесе одлука да го достави до Собранието на Република Македонија согласно член 137 од деловникот на законодавниот дом.
На оваа седница на дневен ред на Владата се најдоа повеќе годишни програми и финансиски планови за работа за 2019 година на повеќе министерства, органи во состав, агенции и јавни претпријатија.
На предлог на Министерството за економија на денешната седница Владата го донесе новиот текст на Програмата за конкурентност, иновации и претприемништво за 2019 година, како и Програмата за промоција на обновливи извори на енергија и поттикнување на енергетска ефикасност во домаќинствата за 2019 година.
Во рамките на надлежностите на ова министерство денеска се усвоени и Програмата за заштита на потрошувачите за периодот 2019-2020 година, како и Програмата за поддршка на домашен туризам за работници со ниски приходи.
