Српскиот претседател Александар Вучиќ изјави дека денес, на покана на украинскиот претседател Володимир Зеленски, ќе присуствува на состанок на Карпатската иницијатива за интеграција, важен проект за економско, транспортно и инфраструктурно поврзување на земјите од поширокиот Карпатски регион.
Вучиќ нагласи дека присуствува на состанокот за дополнително да обезбеди стабилност и мир за граѓаните на Србија. „Во изминатите неколку дена, чешкиот премиер Андреј Бабиш и полскиот премиер Доналд Туск дадоа остри изјави за тоа како нè чека пекол во Европа, а судејќи според цените на нафтата и гасот, тие не се далеку од вистината. И кога ќе видите колку се високи цените на горивата во Германија и Австрија, ви е јасно дека се соочуваме со големи проблеми, поради што денес ќе мора да донесеме дополнителни одлуки и да издвоиме повеќе гориво, особено дизел, од нашите резерви“, рече Вучиќ во видео објава на Инстаграм .
Тој нагласи дека една од причините за присуство на денешниот собир е економската експанзија на Карпатскиот регион, и дека покрај државите, во оваа иницијатива треба да учествуваат и региони како што се Војводина, Браничевско, Бор и Зајечарско.
„Една од причините за денешниот собир, а јас присуствувам на собирот во Украина на Карпатската иницијатива за интеграција, е токму тоа што поширокиот Карпатски регион се поврзува економски. Станува збор за развој на трговските односи, економијата, транспортните врски и напредокот на инфраструктурата. Во оваа поширока Карпатска иницијатива не треба да учествуваат само Србија, Австрија, Чешка, Словачка, Полска, Унгарија, Романија и Украина, туку треба да учествуваат и специфични региони: целиот североисточен дел од Србија, од Војводина до Браничевскиот, Борскиот и Зајечарскиот округ“, рече Вучиќ.
Тој нагласи дека Србија има многу да понуди во однос на транспортната поврзаност, особено со Романија и Унгарија. „Веруваме дека во однос на транспортната поврзаност, особено со Романија и Унгарија, а исто така и со Украина и Полска, имаме многу да понудиме – од железници, патишта, до поотворени граници, до подобра соработка во земјоделството и во сите други области“, рече српскиот претседател. Тој додаде дека е многу задоволен што денес разговара со словачкиот премиер Роберт Фицо.
„Верувам дека на денешниот состанок, а особено се радувам на средбата со Роберт Фицо, мојот словачки пријател и премиер на таа прекрасна земја, можеме да направиме многу, да постигнеме многу и да ги разгледаме сите тешкотии што нè очекуваат и да се обидеме заедно да ги решиме“, рече Вучиќ.
