Остатоците од приватниот авион кој летал од Анкара кон Триполи, а во кој се наоѓал началникот на Генералштабот на либиската армија, се пронајдени јужно од турската престолнина, соопшти во вторник турскиот министер за внатрешни работи Али Јерликаја.
Како што изјави Јерликаја, остатоците од деловниот авион „Фалкон 50“, кој полетал од аеродромот Есенбога во Анкара на пат кон Триполи, биле лоцирани од жандармериски екипи на околу два километри јужно од селото Кешикавак, во округот Хајмана.
Контактот со авионот, со регистарска ознака 9H-DFJ, бил изгубен околу 20:52 часот по локално време, кратко по полетувањето во 20:10 часот. Според турските власти, авионот претходно испратил сигнал за итно слетување во близина на Хајмана, по што не било можно да се воспостави понатамошна комуникација.
Според официјални информации, во авионот се наоѓале пет лица, меѓу кои и началникот на Генералштабот на либиската армија, генерал Мохамед Али Ахмед Ал-Хадад.
Турските власти најавија дека информациите ќе се ажурираат како што ќе напредува истрагата и спасувачките активности на терен.
Во меѓувреме, Владата на Либија со седиште во Триполи ја потврди смртта на еден висок командант на армијата и четворица негови соработници, откако авионот со кој патувале изгубил контакт во близина на Анкара.
