Меѓународната федерација на новинари (ИФЈ) објави застрашувачки податоци за 2025 година, наведувајќи дека вкупно 128 новинари и медиумски работници го загубиле животот ширум светот, меѓу кои и десет жени.
Ажурираната листа на убиени медиумски професионалци за 2025 година содржи 17 дополнителни смртни случаи откриени по 10 декември, откако претходниот извештај беше објавен.
Оваа листа, објавена на 31 декември, ги вклучува трагичните настани од Појасот Газа, Танзанија, Перу и Гватемала. Исто така, документира несреќа во Нигерија во која загинаа седум медиумски работници, како и еден случај во Бурунди и еден во Иран.
Најсмртоносниот регион за новинарите во 2025 година бил Блискиот Исток и арапскиот свет, каде што биле убиени 74 професионалци. Од нив, 56 биле во Палестинската самоуправа, што претставува значајни 58 проценти од вкупниот број на убиени медиумски работници на глобално ниво.
Ова е трета последователна година овој регион да биде најризичен за новинарите. На второ место по број на жртви е Јемен со 13 загинати, додека Украина е на третото место со осум убиени новинари и медиумски работници.
Убиствениот бран продолжи и во други земји: шест новинари се убиени во Судан, по четири во Индија и Перу. Неколку други држави, вклучувајќи ги Филипините, Мексико, Перу и Пакистан, забележале по три загубени новинарски животи.
Меѓу вкупниот број на загинати новинари, забележани се и девет смртни случаи кои се последица на несреќи.
ИФЈ остро ги осуди настаните, опишувајќи ја годината како „уште една смртоносна година за новинарите“ и посочувајќи на „постојаниот неуспех на властите да ги заштитат медиумските работници“.
Федерацијата упати итен повик за „итна и решителна акција за прекинување на циклусот на насилство“, потенцирајќи дека неказнивоста за овие злосторства продолжува да преовладува.
„Светот не може повеќе да чека, време е за конвенција на Обединетите нации, која ќе ја гарантира безбедноста и независноста на новинарите насекаде“, изјави генералниот секретар на ИФЈ, Ентони Белангер.
Во споредба со претходната 2024 година, кога ИФЈ регистрираше 122 смртни случаи на новинари и медиумски работници (вклучувајќи 14 жени), а 516 новинари беа задржани во притвор.
За 2025 година, бројот на затворени новинари и медиумски работници достигна 533, при што најголем број од нив биле во Кина.
