Пацифичкиот рај Тувалу е една од најоддалечените земји во светот, опкружена со изобилство на егзотични риби и шарени корали. Оваа островска држава се наоѓа во полинезискиот појас, помеѓу Австралија и Хаваи.
До 15 април, кога беа воведени првите банкомати, плаќањата во оваа земја се вршеа исклучиво во готово. Затоа доаѓањето на банкоматот го одбележаа со прослава.
Додека официјални лица се собраа пред еден од банкоматите на островот Фунафути, еден од најголемите атоли (корални острови) во земјата, премиерот Фелеити Тео го поздрави овој потег, нарекувајќи го „значајна пресвртница“.
На прославата, премиерот Тео, опкружен со локални претставници, исече огромна чоколадна торта.
Сиосе Тео, извршен директор на Националната банка на Тувалу, која управува со банкоматите, рече дека тоа е „трансформативна промена“ што ќе ја „отвори вратата за економско зајакнување на народот на Тувалу“, нација со околу 11.200 жители.
„Тоа дефинитивно ќе ги сруши бариерите и ќе ги приближи луѓето до модерните и доверливи банкарски услуги“, рече Нисар Али од Pacific Technology, кој помогна во дизајнирањето на банкоматот, објави австралискиот јавен сервис ABC.
Тувалу е една од најмалите земји во светот, нејзините девет мали острови зафаќаат само 25 квадратни километри заедно.
Таму не патуваат многу луѓе. Нешто повеќе од 3.000 туристи го посетиле островот во 2023 година, според официјалните бројки.
Земјата има еден аеродром, на Фунафути, со само неколку летови неделно, а тоа е преку нејзиниот пацифички сосед Фиџи. Кога авионите не слетуваат, локалните жители ја користат пистата како игралиште за сите видови активности од рагби до фудбал. Луѓето се превезуваат со траект од остров до остров, бидејќи нема домашни летови.
Со максимална надморска височина од само четири и пол метри, Тувалу е исклучително ранлив на подигање на нивото на морето и е една од најзагрозените земји од климатската криза.
Нивото на морето не само што ги турка надолу неговите брегови, туку солената вода го еродира ограниченото земјоделско земјиште. Зголемувањето на температурата на морето го загрозува и морскиот живот.
