Американскиот претседател Доналд Трамп изјави дека технолошкиот магнат Илон Маск ќе се соочи со „сериозни последици“ доколку финансира демократски кандидати за да се спротивстават на републиканците кои го поддржуваат неговиот сеопфатен закон за даноци и трошење.
Во телефонски разговор за Ен-Би-Си Њуз, Трамп не прецизираше какви би биле тие последици, велејќи само: „Ако го направи тоа, ќе мора да ги сноси последиците, многу сериозни последици.“
Трамп истакна дека нема намера да го поправа односот со Маск по нивната јавна расправија оваа недела. Прашан дали е крај на нивниот однос, тој одговори: „Претпоставувам дека е“.
Додаде дека е презафатен со други обврски и нема планови за разговор со Маск, обвинувајќи го за „непочитување на претседателската функција“.
Конфликтот ескалираше откако Маск во четвртокот на платформата Икс објави серија критики против Трамп, вклучувајќи избришана објава во која тврдеше дека името на Трамп се споменува во документите на Џефри Епстајн, осудениот сексуален престапник. Трамп ги отфрли овие тврдења како „стари вести“ и истакна дека дури и адвокатот на Епстајн потврдил дека тој нема врска со случајот. Маск, исто така, избриша објава во која повикуваше на отповикување на Трамп.
Според „Вашингтон Пост“, Трамп приватно го нарекол Маск „голем зависник од дрога“, повикувајќи се на неговата употреба на кетамин, кој Маск тврди дека му е препишан за лекување депресија. Белата куќа посочи дека загриженоста за наводната употреба на дрога од страна на Маск е еден од факторите што ја предизвикале расправијата. Сепак, Трамп бил воздржан во јавните напади против Маск, за разлика од неговите вообичаени остри реакции кон критичарите.
И покрај тензиите, Трамп изјави дека нема да ги укине федералните договори со компаниите на Маск, како Тесла и СпејсХ, иако додаде дека би можел да го стори тоа.
Тој нагласи дека Републиканската партија е „пообединета од кога било“ и дека спорот со Маск дури помогнал да се истакнат предностите на предложениот закон.
Расправијата откри подлабоки пукнатини во сојузот меѓу Трамп и Маск, кој започна како близок соработник на администрацијата во јануари. Според „Вашингтон Пост“, Маск имал конфликти со членови на кабинетот на Трамп, вклучувајќи и обид за физички судир со министерот за финансии Скот Бесент. Републиканците стравуваат дека Маск, со своето огромно богатство, би можел да финансира трета политичка партија како одмазда.
Портпаролката на Белата куќа, Каролин Левит, изјави дека администрацијата останува фокусирана на реформите за намалување на трошоците и расипништвото, и покрај конфликтот што го привлече вниманието на Вашингтон.
