Трагедијата во Кочани, која одзеде десетици животи, не е само несреќен случај – таа е предупредување. Пожарот во дискотеката „Пулс“ ја разоткри суровата реалност: колку малку внимание посветуваме на противпожарната заштита и безбедноста во јавните и станбените објекти.
Скопје, како и многу други градови низ земјата, има огромен проблем со безбедноста во зградите. Колку од нас знаат дали во нашите згради постојат исправни противпожарни системи?
• Дали вашата зграда има хидрантска мрежа и дали е функционална?
• Дали хидрантите имаат црева за вода или одамна се украдени?
• Дали зградата има противпожарни апарати и кога последен пат биле сервисирани?
• Дали пристапите до противпожарните скали се слободни или заградени со мебел и други препреки?
Овие прашања не смеат да останат без одговор. Во многу станбени објекти, особено во постарите згради, противпожарната опрема е или нефункционална или воопшто не постои. Животите на илјадници луѓе зависат од исправноста на овие системи, но одговорноста за нив е често занемарена.
Време е за акција!
Локалните власти и инспекторатите мора итно да извршат проверки во сите згради, да наложат поправки и да ги казнат несовесните управители. Сопствениците на станови, пак, мора да бараат отчетност и да преземат чекори за да ја подобрат безбедноста во своите згради.
Пожарите не прашуваат дали сме подготвени. Ако не научиме од оваа трагедија, само прашање на време е кога ќе се случи следната.
