Двајца холандски тинејџери беа пронајдени мртви во хотелска соба во центарот на Истанбул, додека се сомнева дека починале од труење, јавија турските медиуми.
Станува збор за браќата Мохамед Џамил Јусуф (17) и Мохамед Јаздани (15), кои патувале во Истанбул заедно со својот татко, Рашид Мохамед Аџоб (57), на одмор. Според извештаите на Сабах хабер плус, семејството претходно посетило ресторан во населбата Таксим во петокот вечерта. Додека синовите јаделе во ресторанот, таткото не ја пробал храната.
Утрото, персоналот на хотелот, слушајќи бучава од нивната соба, влегол и ги нашол децата неподвижни на подот. Таткото бил во состојба на шок и малаксан. Брзата помош веднаш пристигнала на местото на настанот – констатирана била смрт кај двете деца, додека Аџоб бил пренесен во болница за лекување. Член на хотелскиот персонал потврди дека кога влегле во собата, двете момчиња веќе биле мртви.
Полицијата во Истанбул отвори истрага за да утврди дали смртта на тинејџерите е предизвикана од труење со храна. Таткото, кој бил пренесен во болница, на здравствените службеници изјавил дека неговите синови се вратиле од Таксим и брзо им се слошило во хотелската соба.
Оваа трагедија доаѓа во контекст на зачестени фатални инциденти во Турција, особено поврзани со алкохол и храна. По Нова Година, во Истанбул се случи масовно труење при кое загинаа 34 лица. Во мај, властите соопштија дека повеќе од 100 лица во Анкара починале по консумирање „домашен“ алкохол.
Турските медиуми нагласуваат дека властите сега ги истражуваат сите можни причини за смртта на браќата, вклучително и труење со храна или алкохол, како и други потенцијални ризици на туристички локации.
