Сè поинтензивните шумски пожари и топлотните бранови би можеле да ги загрозат и забават глобалните напори за подобрување на квалитетот на воздухот и заштита на здравјето на луѓето, предупреди во понеделник Светската метеоролошка организација (СМО). Климатските промени, според неа, го отежнуваат постигнувањето на меѓународните цели за квалитет на воздухот.
Во својот годишен извештај за квалитетот на воздухот и климата, СМО наведува дека загадувањето на воздухот и климатските промени се тесно поврзани проблеми на кои мора да се пристапи со координирани политики, наместо да се решаваат одделно.
Организацијата предупредува дека исполнувањето на упатствата на Светската здравствена организација за квалитет на воздухот ќе станува сè потешко, со оглед на тоа што во иднина се очекуваат екстремни шумски пожари.
Шумските пожари стануваат сè поголем извор на штетно загадување на воздухот, и покрај тоа што емисиите од индустријата и транспортот се намалени во многу развиени земји благодарение на голем број нови регулативи, според извештајот на СМО.
„Без разлика колку е чист вашиот град или вашиот регион… ако сте изложени на често загадување од шумски пожари, тоа може негативно да влијае и на квалитетот на воздухот во тие региони“, изјави за Ројтерс Лоренцо Лабрадор, научник во СМО.
Во извештајот посебно се посочува зголеменото влијание на фините честички познати како PM2.5, како и на приземјениот озон, штетен гас што се наоѓа во долните слоеви на атмосферата. Нивното присуство е поврзано со зголемување на респираторните и кардиоваскуларните заболувања.
Студијата на која се повикува СМО покажа дека екстремните пожари и опасниот чад низ целиот свет се зголемиле тројно од 1990-тите и веројатно придонеле за речиси 100.000 дополнителни смртни случаи годишно помеѓу 2010 и 2018 година.
СМО, исто така, повикува на подобро следење на загадувачите и аеросолите, вклучувајќи го црниот јаглерод и микропластиката. Организацијата предупредува дека следењето на овие материи останува многу слабо, и покрај нивното широко распространето присуство во атмосферата.
Оваа година беше обележана со екстремна топлина и разорни шумски пожари во бројни делови од Европа, вклучувајќи ги Шпанија, Франција и Грција.
СМО истакнува дека екстремната топлина станува сè почеста, поинтензивна и подолготрајна како што се затоплува планетата.
Според новиот извештај, концентрациите на PM2.5 во 2025 година биле над долгорочните просеци во северна Канада, делови од Русија и западно-централна Африка поради зголемената пожарна активност, додека северозападна Шпанија била жариште по огромните пожари кон крајот на летото.
Честичките од шумските пожари се особено штетни бидејќи содржат голем број токсични хемикалии, предупреди Лабрадор. Тој додаде дека нивното вдишување може да предизвика воспаление низ целото тело, што може да резултира со развој на белодробни заболувања.
