Skip to main content
Македонија

Средба на министерот Муцунски со министрите за надворешни работи на Литванија, Египет и Јордан

01/09/2025  19:21

На маргините на Бледскиот стратешки форум, министерот за надворешни работи и надворешна трговија, Тимчо Муцунски, денес оствари одделни средби со министерот за надворешни работи на Литванија, Кестутис Будрис, министерот за надворешни работи на Арапската Република Египет, Бадр Абделати, како и со заменик-премиерот и министер за надворешни работи и иселеници на Хашемитското Кралство Јордан, Ајман Ал-Сафади.

Министерот Муцунски изрази благодарност за доследната и принципиелна поддршка на Литванија за македонската интеграција во ЕУ и за нејзината стратешка визија во однос на проширувањето на Унијата и европската иднина на земјите од Западен Балкан. Особено беше потенцирана литванската експертска и техничка помош во исполнувањето на европските критериуми.

Двајцата министри ја потврдија посветеноста за натамошно унапредување и продлабочување на севкупните билатерални односи и соработка, базирани на длабоко пријателство и споделени вредности.

На средбите со министрите на Египет и Јордан беше нагласена заедничката заложба за интензивирање на билатералните односи, пред сè на политичко ниво, но и во делот на економијата, трговијата, културата и образованието.