Иако секој родител го сака најдоброто за своето дете, понекогаш ненамерните грешки во грижата може да придонесат – тоа почесто да се разболува, особено наесен.
Родителите често немаат добро чувство како да облечат новороденче или бебе. Правилото е секогаш тоа да има еден слој повеќе од возрасниот. Ако, на пр., родителот носи блуза, детето носи две парчиња горна облека. Ако, пак носиме маица со кратки ракави – бебето носи речиси исто толку тенка блуза со долги ракави, или боди со долги ракави. За надвор, новороденчето се облекува исто како и за дома – но со јакничка, панталони и тенко ќебе. На постудени температури, обезбедуваме потопли – уште еден чифт чорапи и подебела јакна, како и шапка или лента за глава. Новороденчињата често имаат ладни раце и нозе, но не им е ладно. Причината за ова е што нивната циркулација на крвта е сè уште слабо развиена, пишува порталот „Кликс“.
Од друга страна, пак, говорејќи за малите деца, имајте предвид дека тие постојано се движат. Тие трчаат, играат и, следствено – повеќе се потат. Облечете го во неколку тенки слоеви, што потоа може да се прилагодат во зависност од временските услови.
Социјализацијата на децата со кучиња и други домашни миленици е корисна за здравјето на децата, открива истражување спроведено во Канада. Според наводите, изложеноста кај бремени жени и деца го зголемува присуството на два вида бактерии во цревата – поврзани со помал ризик од алергии и дебелина. Имено, присуството на кучиња и мачки го зајакнува имунолошкиот систем на детето.
Постојаната дезинфекција на просторијата и одржувањето на површините стерилни може да предизвика повеќе штета отколку корист за детето. Ова ќе го спречи воспоставувањето и зајакнувањето на имунолошкиот систем на детето, правејќи го поподложно на болести.
За да биде детето здраво и безгрижно, важно е и да минува доволно време на отворено. Тоа, освен што му помага да ги развие физичките способности, го одржува и психо-физичкото здравје на децата и ја развива неговата мисла, креативност и самодоверба. Некои родители се погрешно убедени дека на нивното дете му е потребен антибиотски третман при првиот знак на настинка. Најважно при настинка е редовно чистење на носот со физиолошки раствор и редовно вдишување. Физиолошкиот раствор ги опушта дишните патишта и ќе му овозможи на детето полесно да дише.
