Шпанија е првиот финалист на Светското првенство, откако вечерва во полуфиналниот натпревар во Далас ја совлада Франција со убедливи 2:0. Шпанците одиграа одличен натпревар, целосно ја контролираа играта и заслужено обезбедија место во големото финале.
Избраниците на шпанскиот селектор ја презедоа иницијативата уште од самиот почеток, додека Франција не успеа да пронајде решение за организираната и агресивна игра на противникот.
Резултатот беше отворен во 22. минута, кога Микел Ојарзабал реализираше пенал, откако претходно Ламин Јамал беше соборен во шеснаесетникот од Лукас Дињ. Иако францускиот голман Мајк Маињан ја погоди страната, ударот на Ојарзабал беше неодбранлив.
Со овој погодок, Ојарзабал стигна до својот петти гол на шампионатот и се запиша меѓу најдобрите шпански стрелци на едно Светско првенство, покрај Емилио Бутрагењо и Давид Виља.
Франција дополнително беше ослабена во 30. минута, кога поради повреда теренот мораше да го напушти Вилијам Салиба, што дополнително ги наруши дефанзивните линии на „триколорите“.
Во второто полувреме следуваше потврда на шпанската доминација. Во 58. минута, Педро Поро по одлична комбинација со Дани Олмо излезе сам пред голманот Маињан и со прецизен удар ги постави конечните 2:0.
Само неколку минути подоцна, Ламин Јамал успеа да ја затресе француската мрежа и по трет пат, но погодокот беше поништен поради офсајд.
Французите се обидоа да се вратат во игра дури по вториот примен гол, но шпанската одбрана функционираше беспрекорно. Тимот на Дидие Дешан, кој пред почетокот на полуфиналето важеше за еден од главните фаворити за титулата, не успеа да создаде сериозен притисок.
Најголемата можност за Франција пристигна во 81. минута, кога Дезире Дуе имаше празен гол пред себе по грешката на Унаи Симон, но шпанскиот чувар на мрежата успеа експресно да се врати и да интервенира.
Фрустрацијата кај Французите беше очигледна и во самиот финиш на средбата. Килијан Мбапе заработи жолт картон по неспортски потег врз голманот Унаи Симон, симболично за една од најслабите партии на Франција на овој мундијал.
Шпанија со оваа победа се пласира во своето второ финале на Светско првенство и ќе го чека победникот од полуфиналниот дуел меѓу Аргентина и Англија. Франција, пак, ќе игра во натпреварот за третото место, а со поразот заврши и нивната серија од две последователни мундијалски финалиња.
