Двајца руски полковници паднаа од прозорец во рок од два дена еден од друг, приклучувајќи се на растечката листа на високи функционери кои ги загубија животите под сомнителни околности откако Владимир Путин ја започна војната во Украина.
Од почетокот на инвазијата на Украина во февруари 2022 година, голем број истакнати руски личности – од тајкуни и претприемачи до високи функционери и водачи на нафтени компании – загинаа под неразјаснети околности.
Интересно е тоа што многумина ги загубија животите паѓајќи од прозорците.
Еден од последните такви случаи е смртта на Артур Пријахин (56), шеф на регионалниот огранок на руската Федерална антимонополска служба (ФАС) во Република Карелија. Прјахин на 4 февруари околу пладне падна од петти кат од деловна зграда и почина на лице место. Локалните власти тврдат дека во канцеларијата оставил белешка за самоубиство во која и се извинува на сопругата, бара прошка од најблиските и нагласува дека никој не е виновен за неговата смрт.
Рускиот истражен комитет го потврди неговиот идентитет и заклучи дека се работи за самоубиство. Сепак, истражителите се уште ги испитуваат околностите на неговиот пад.
Прјахин претходно во кариерата беше полициски полковник, а во 2014 година ја презеде челната позиција во регионалниот огранок на ФАС, објави рускиот весник „Известија“. Од 2010 до 2011 година беше началник на Одделот за економски криминал при Министерството за внатрешни работи на Република Карелија.
Два дена подоцна, шефот на форензичкиот центар на Рускиот истражен комитет, полковник Алексеј Зубков, паднал од прозорец од четвртиот кат на деловна зграда. Тој го преживеал падот и бил пронајден свесен, објави порталот МК.ру, додавајќи дека избегнал сериозни повреди. Зубков изјавил дека бил во бањата – од каде паднал – но не се сеќава на моментот на падот. Тој е хоспитализиран и истрагата е во тек.
„Колегите шпекулираат дека Зубков бил под голем стрес ден пред завршниот состанок на Истражниот комитет. Неговите претпоставени, првиот заменик директор на ДИК Александар Соболев и генералот на главната дирекција на противпожарната служба Анатолиј Сазонов, биле на местото на настанот“, објави порталот ВЧК-ОГПУ, кој тврди дека има внатрешни информации од руските безбедносни служби.
Уште еден сличен инцидент се случи неколку дена претходно, кога 58-годишниот руски музичар и радио водител Вадим Стројкин почина откако падна од прозорецот на неговиот стан во Санкт Петербург додека властите го претресуваа неговиот дом, пишува Комсомолскаја Правда. Претресот, според извештаите, бил дел од кривична истрага.
