
Претседателката Гордана Сиљановска-Давкова денеска ги прими акредитивните писма од Н.Е. г-а Јана Ванамолдер, новоименувана амбасадорка на Република Естонија, со седиште во Будимпешта.
На свечената церемонија, таа го истакна примерот на Естонија во демократската транзиција, институционална модернизација и дигитална експанзија, како релевантен реформски модел.
За претседателката, политичката и безбедносната соработка треба да се дополнат со економска, образовна, научна, културна и туристичка. Обете ја потврдија важноста на сојузништвото во НАТО, во контекст на актуелните безбедносни состојби и закани.
Претседателката изрази благодарност за поддршката што Естонија ни ја дава на евроинтегративниот пат.
Сиљановска-Давкова се заложи за преговори ослободени од билатерални услови од идентитетска природа и за јасни, предвидливи и објективни критериуми, засновани врз темелните европски вредности и постигнатите реформски резултати.
Амбасадорката Ванамолдер укажа на неизвесноста на преговарачкиот процес врзан за билатералните прашања и изрази разбирање за регионалните заложби и нашите природни европски амбиции.
Таа потсети на важноста на меѓусебната регионална поддршка за побрзиот процес на преговори и стекнување членство во ЕУ.
За неа, европската иднина на регионот се гради преку партнерство, меѓусебно разбирање и проширување.
Претседателката Сиљановска-Давкова ѝ посака успешен мандат на амбасадорката Ванамолдер.

