Содржината што ја читаме и гледаме онлајн секој ден е сè повеќе обликувана од алгоритми, а сè помалку од луѓе. Новите истражувања покажуваат дека вештачката интелигенција веќе генерира повеќе од половина од новата содржина на глобалната мрежа, дополнително поттикнувајќи ја дебатата за автентичноста на информациите и таканаречената „теорија на мртов интернет“.
Според заедничкото истражување на Технолошкиот институт во Масачусетс (МИТ) и Интернет институтот во Оксфорд, дури 64 проценти од новата содржина на интернет е генерирана од вештачка интелигенција.
Истражувањата покажаа дека, по појавата на алатки како Chat GPT, 35 проценти од новите веб-страници покажаа значајни траги од авторство од вештачка интелигенција.
Социјалните мрежи го предводат овој тренд – се проценува дека 52 проценти од содржината на нив е генерирана со помош на вештачка интелигенција, а до крајот на 2026 година тој удел би можел да достигне 90 проценти.
Кога станува збор за визуелна содржина, проценките се уште повисоки: дури 79 проценти од сликите на Инстаграм, ТикТок и Пинтерест наводно се генерирани од вештачка интелигенција.
Растот на уделот на содржината генерирана од алгоритми ја разгоре „теоријата за мртов интернет“ – идејата дека интернетот е сè повеќе доминиран од автоматизирани системи и од сè помалку луѓе.
Загриженоста дополнително ја зголеми компанијата Cloudflare, која објави дека ботовите со вештачка интелигенција за прв пат генерирале повеќе интернет сообраќај од луѓето.
Во исто време, една анализа покажа дека речиси секој трет одговор генериран од вештачката интелигенција е неточен, што покренува прашања за веродостојноста на растечката количина информации на интернет.
Како да препознаете содржина од вештачка интелигенција
Истражувачите, исто така, посочуваат на одредени стилски карактеристики кои се сè почести во текстовите создадени со помош на вештачка интелигенција.
Анализата на речиси половина милион веб-страници покажа дека употребата на цртички речиси двојно се зголемила, додека употребата на Оксфордската запирка се зголемила за 63 проценти. Одредени зборови што често ги користат четботовите сега се појавуваат и повеќе од двојно почесто.
Сепак, ниту еден збор или лингвистичка конструкција не е доказ дека текстот е напишан од вештачка интелигенција.
Употребата на ВИ не е рамномерно распределена. Веб-страниците со доменот „.com“ покажуваат двојно повеќе траги од авторство на ВИ отколку страниците со доменот „.org“, а дури десет пати повеќе од оние со домени „.edu“ и „.gov“.
Со зголеменото присуство на вештачка интелигенција на интернет, расте и потребата од поголема транспарентност. Европската Унија веќе воведе правила што бараат јасно означување на одредена содржина генерирана од вештачка интелигенција.
Прашањето повеќе не е само колку содржина може да произведе вештачката интелигенција, туку и како ќе изгледа интернетот на кој сè поголем дел од она што го читаме, гледаме и споделуваме повеќе нема да биде дело на човечки автори.
