Политичката партија Левица информираше дека починал нивниот долгогодишен член и сопартиец Кирил Слезенковски, кој беше дел од Централниот комитет и советник во Советот на Општина Илинден.
Од партијата соопштија дека веста ја примиле со длабока тага, нагласувајќи дека Слезенковски не бил само носител на функции, туку и човек кој политиката ја разбирал како одговорност кон луѓето.
„Беше пример за човек кој несебично се вложува во заедницата – самоиницијативен, одговорен и секогаш подготвен да помогне во решавањето на проблемите“, се наведува во соопштението.
Тие истакнуваат дека неговите лични квалитети – чесноста, енергичноста, солидарноста и позитивниот дух – го издвојувале како посветен и принципиелен активист. Во време кога политиката често се сведува на лични интереси, Слезенковски, според нив, бил спротивен пример, водејќи се од идејата за општо добро.
Како советник во Општина Илинден, тој бил препознаен како „глас на граѓаните“, познат по аргументирани настапи и цврст став во заштита на јавниот интерес. Во рамки на партијата, бил ценет како човек на кој може да се потпрат – со идеи, знаење и искрена посветеност.
Од Левица нагласуваат дека загубата е уште потешка бидејќи станува збор за млад човек со значителен потенцијал и визија за идниот развој на Илинден, Скопје и државата.
„Ќе го паметиме пред сè како другар – човек кој знаеше да биде и силен и топол во исто време“, стои во соопштението.
Од партијата изразија сочувство до семејството, пријателите и сите кои го познавале, потенцирајќи дека неговото дело и пример ќе останат трајно присутни во јавниот живот.
