Банките вчера ја започнаа исплатата на ноемвриските пензии, а процесот треба да заврши до понеделник, 1 декември, информира ПИОМ. Фондот нагласува дека исплатата е стабилна и редовна, отфрлајќи ги шпекулациите за ризици во системот. Во координација со Владата, исплатата ќе продолжи секој први во месецот и во 2026 година.
– Пензионерите и осигурениците можат да бидат спокојни, пензии редовно се исплаќаат и ќе се исплаќаат и во иднина секој први во месецот. Исплатата на пензиите не е доведена во прашање, бидејќи Владата ја гарантира истата и не треба да има никаков сомнеж или страв дека пензии нема да има, велат од Фондот.
ПИОМ ги демантира тврдењата дека сегашните и идните пензии се загрозени.
– Шпекулациите кои се пласираат од страна на СДСМ и политичкиот притисок кон Уставниот суд дека е загрозена исплатата на сегашните и идните пензии се неосновани и служат единствено за вознемирување на пензионерите и граѓаните во државата, стои во реакцијата.
Фондот додава дека буџетот за 2026 година изнесува речиси 151 милијарда денари, планирани за пензии, здравствено осигурување и трошоци кон вториот столб. Во изминатата година пензиите пораснале линеарно за 6.000 денари, со што просечната пензија од 21.000 во септември 2024 година достигнала 27.000 денари во септември 2025 година.
– Покачувањето и линеарното усогласување на пензиите се во насока на подобрување на животниот стандард на пензионерите и намалувањето на влијанието на инфлацијата, велат од Фондот.
