Иднината на Иран ќе ја обликува народот на Иран, објави денеска на својот профил на Х иранскиот претседател Масуд Пезешкијан, нарекувајќи ги припадниците на иранскиот народ „херои“ затоа што, според него, се спротивставија на војната што САД и Израел ја водат против земјата.
Пезешкијан рече дека конфликтот почнал на 31 јули 2024 година со убиството на политичкиот лидер на Хамас, Исмаил Ханија, за време на неговиот престој во Техеран на церемонијата на инаугурацијата на Пезешкијан.
„Пред две години, почетокот на нашата работа се совпадна со ционистичкото убиство на нашиот драг гостин. Веќе две години на народот на Иран му се наметнуваат војни, притисоци и непрекинати непријателства. Во сите тие тешки денови, во прв план излегоа вистинските народни херои. Иднината на Иран ќе ја обликува самиот народ на Иран“, се наведува во објавата на Пезешкијан.
