Од утре, 8 јануари 2026 година, со почеток во 10:00 часот, граничниот премин Меџитлија (Ники) ќе биде целосно затворен за товарниот сообраќај. Како што информираат од Авто-мото сојузот на Македонија (АМСМ), блокадата е поради протест на грчките земјоделци, кои најавија радикализација на своите активности.
Забраната за движење на камионите ќе трае 48 часа, односно до сабота, 10 јануари, во 10:00 часот. Во овој период, преминот ќе биде непрооден исклучиво за товарни возила, додека патничкиот сообраќај ќе се одвива согласно состојбата на терен.
Од АМСМ апелираат превозниците навремено да ги пренасочат своите рути и да користат алтернативни гранични премини, како и редовно да ги следат официјалните информации за евентуални промени на состојбата.
