„Ние сме новата надеж. Ние сме промената која не се плаши да се соочи со предизвиците, да ги поправи грешките и да воспостави правичен ред.“ Ова го истакна претседателот на ВМРО-ДПМНЕ и премиер на Република Македонија, Христијан Мицкоски, вечерва во Битола, на одбележувањето на 25-годишнината од основањето на партијата.
Мицкоски нагласи дека Владата предводена од ВМРО-ДПМНЕ ја презела одговорноста во време на сериозна економска и општествена криза, кога граѓаните биле разочарани и обесправени.
„Но денес, со гордост можеме да кажеме дека нашата држава е една од најбрзорастечките економии во Европа и има четврти највисок економски раст. Тоа не е само бројка – тоа е показател дека сме на вистинскиот пат“, рече тој.
Сепак, Мицкоски подвлече дека владата нема намера да се задоволи со статистика:
„Знаеме дека овој раст не е доволен. Народот сè уште не го чувствува подобрувањето во секојдневниот живот. Затоа упорно работиме – на санирање на штетите од минатото, на стабилна и предвидлива економија, на отворање нови работни места, на подобри услови за сите – особено за младите, земјоделците и пензионерите.“
Премиерот посочи и дека Македонија нема повеќе да биде земја на понижување и предавство.
„Нашата надворешна политика е достоинствена, принципиелна и заснована на заштита на нашата заедничка историја, култура и идентитет,“ истакна Мицкоски пред насобраните членови и симпатизери во Битола.
