Мегајахта поврзана со санкциониран руски олигарх помина низ прометниот Ормутски теснец порано денес, покажуваат податоците за следење на бродовите. Јахтата „Норд“, долга речиси 142 метри, исплови од Дубаи во Обединетите Арапски Емирати синоќа и помина низ клучниот воден пат преку ноќ, според податоците од MarineTraffic, објави CNN .
Податоците покажуваат дека плови кон Мускат, Оман. Станува збор за една од најголемите јахти во светот, а нејзината вредност се проценува на најмалку 500 милиони долари. Брокер за јахти претходно изјави за Си-Ен-Ен дека се верува дека јахтата му припаѓа на Алексеј Мордашов, претседател на рускиот гигант за челик и рударство и еден од најбогатите руски милијардери.
Асошиејтед Прес претходно објави дека Мордашов е сопственик на тој брод. Си-Ен-Ен претходно објави дека американскиот Стејт департмент вовел санкции врз Мордашов, како и врз три од неговите компании, неговата сопруга и две возрасни деца во 2022 година.
Јахтата, која е околу еден и пол пати подолга од американско фудбалско игралиште, се чини дека поминала покрај иранскиот остров Ларак. „Лојдс Лист Интелиџенс“ претходно објави дека рутата ја користи Иранската револуционерна гарда за контрола на пристапот до Ормутскиот теснец.
„Норд“ има два хелиодроми, а ваквите бродови обично имаат голем персонал, вклучувајќи готвач со полно работно време, фитнес инструктор и масер, изјави брокерот за јахти Мајкл Максимилијан Богние за Си-Ен-Ен во 2022 година.
Останува да се види дали патувањето на мегајахтата ќе биде засегнато од американското воено присуство во регионот, вклучително и поморската блокада за која американскиот министер за одбрана Пит Хегсет вчера изјави дека „расте и станува глобална“.
