Емир Селимовиќ, 38-годишниот маж осомничен дека ги уби сопругата и синот со давење во близина на Тузла во Босна и Херцеговина, е уапсен по петдневна потрага, пренесуваат медиумите во БиХ.
Припадници на министерството за внатрешни работи на Република Српска го нашле во селото Горња Мравица кај Прњавор, каде во четвртокот му е откриено и возилото. Според неофицијални информации, Селимовиќ го забележале мештани и веднаш ја известиле полицијата, по што брзо бил уапсен.
Телото на сопругата Инела Селимовиќ (37) и нивниот 13-годишен син беа најдени на 12 февруари во заедничкиот стан во Калесија. Се верува дека Емир Селимовиќ ги задушил.
Селимовиќ по убиствата избегал со автомобил „шкода фабија“. Автомобилот подоцна е најден во селото Горња Мравица, но осомничениот и понатаму бил во бегство. Според извештаите, Селимовиќ бил снимен од камери во близина на Бања Лука за време на бегството.
Тој е фатен по опсежна потрага во селото Горња Мравица.
