Во Јужна Кореја денеска стапи во сила проширен закон за шпионажа, со кој за првпат ќе може да се гонат лица што крадат државни и технолошки тајни во корист на која било странска држава или организација.
Досегашното законско решение овозможуваше обвинение за шпионажа главно кога информациите биле предадени на „непријателска држава“. Во практиката, оваа формулација речиси исклучиво се однесуваше на Северна Кореја.
Новите правила ја прошируваат одговорноста и на активности во корист на други земји. За новото кривично дело е предвидена затворска казна од најмалку три години, додека за најтешките облици може да бидат изречени значително построги казни.
Чиповите стануваат прашање на национална безбедност
Главната причина за измените е зголемениот број случаи на кражба на технологии од индустријата за полупроводници. Јужна Кореја е дом на „Самсунг електроникс“ и „СК Хајникс“, две од најголемите светски компании за производство на мемориски чипови.
Полупроводниците сочинуваат повеќе од 40 отсто од јужнокорејскиот извоз, поради што Сеул ги третира производствените процеси, дизајните и истражувањата како прашање на економска и национална безбедност.
Во 2025 година биле откриени рекордни 33 случаи на незаконско изнесување индустриска технологија, а повеќе од половина биле поврзани со Кина. Особено ранливи се помалите компании што работат како добавувачи на големите производители.
Истражителите откриле случаи во кои пензионирани инженери биле ангажирани преку посреднички и фиктивни компании, со понуди за многу повисоки плати во замена за доверливи информации.
Критичарите предупредуваат дека пошироката дефиниција за шпионажа мора внимателно да се применува за да не се криминализираат легитимната научна соработка и размената на знаење. Обвинителството сепак ќе мора да докаже дека украдената информација претставувала национална тајна и дека била собирана или предадена во корист на странски субјект.
