Три лица биле повредени во инцидент на коњски трки во селото Бијељани кај Билеќа, во Босна и Херцеговина, кога возач со автомобил влетал меѓу присутните и ги газел луѓето. Полицијата соопшти дека интензивно трага по осомничениот, а случајот се истражува како обид за тешко убиство.
Според најновите информации, полицијата трага по Жељко Вујовиќ од Билеќа, осомничен дека управувал со автомобилот. Заедно со него побегнал и М.С., за кого медиумите објавуваат дека е Мирко Самарџиќ. Во меѓувреме се уапсени две лица – Г.Ч. од Билеќа и М.И. од Невесиње – под сомнение дека му помогнале на сторителот по извршувањето на делото. За случајот е известено Окружното јавно обвинителство во Требиње.
Од тројцата повредени, најсериозни повреди има маж роден во 1994 година, кој е примен на интензивна нега во Требиње. Тој е свесен, не ја губел свеста и има повреди на левото рамо и десната потколеница. Другите двајца повредени имаат полесни повреди и се сместени на болничко одделение, изјави докторката Тања Новарлиќ, шефица на интензивната нега.
Вујовиќ, според локалните медиуми, и претходно ѝ бил познат на полицијата. Во 2021 година бил осомничен во случај на киднапирање и претепување млад човек од Билеќа, по што извесно време бил во бегство. Тој случај предизвикал и протести на граѓани во Билеќа и Требиње поради незадоволството од постапувањето на правосудните институции.
