Градот Скопје денеска спроведе обемна и координирана акција со цел воспоставување ред, контрола и почитување на законските прописи на јавните простори низ целата територија на градот.
Во акцијата учествуваа градскиот инспекторат, Државниот пазарен инспекторат и Министерството за внатрешни работи, а активностите беа насочени кон отстранување на нередот и незаконското делување, на „Пластичарска” и на Зимзоленд.
Притоа беа преземени конкретни мерки, изречени прекршочни казни и констатирани неправилности, со јасна заложба дека јавниот простор мора да биде заштитен, уреден и достапен за сите граѓани.
Во прилог објавата на социјални мрежи на градоначалникот Орце Ѓорѓиевски:
Се воспоставува ред на „Пластичарска”, се постапува и на Зимзоленд
Денес градот Скопје, заедно со Инспекторатот и во координација со ДПИ и МВР, спроведе широка акција со единствена цел, да се врати редот и достоинството на јавниот простор на целата територија на градот.
Изречени се повеќе од 20 казни.
Како што најавив, така и постапуваме.
Нема отстапки, нема компромиси со хаосот.
Ги отстрануваме сите појави кои го узурпираат просторот што им припаѓа на скопјани, го попречуваат движењето и го нарушуваат јавниот ред.
Скопје мора да биде град во кој владеат правила, а не самоволието.
Вработените од ЈП „Градски паркинг” ги отстрануваа неправилно паркираните возила долж улицата „Пластичарска”.
По пријави од граѓани, постапивме и на Зимзоленд.
Инспекторатот беше на локацијата и утврди дека градот Скопје нема дадено дозвола за таму да се врши дејност.
Констатирани се повеќе неправилности, особено во однос на вршење дејност надвор од објект.
Дополнително, за реквизитите и забавните содржини кои не се дел од програмата на Општина Аеродром, наложено е градежниот инспектор од општината да постапи согласно законските регулативи.
Градот Скопје и јас како градоначалник ќе продолжиме бескомпромисно да се бориме против секоја неправилност, секој обид за узурпација и секој хаос кој го загрозува јавниот простор.
Овој град заслужува ред, а скопјани заслужуваат достоинствено, безбедно и уредено место за живеење.
Редот е обврска. И ние ја исполнуваме.
