Новак Ѓоковиќ испиша нова страница во историјата на Вимблдон, откако со победата над Роман Сафјулин ја забележа својата 106-та победа на тревните терени на Ол Ингланд Клубот. Со тоа српскиот ас го надмина рекордот на Роџер Федерер и стана најуспешниот тенисер во историјата на Вимблдон според бројот на победи.
Во меч што траеше четири сета, Ѓоковиќ славеше со 7:6 (8:6), 6:3, 3:6, 6:3 и обезбеди пласман во своето 17-то четвртфинале на Вимблдон, продолжувајќи ја потрагата по рекордната 25-та Гренд слем титула.
Иако важеше за голем фаворит, српскиот тенисер не дојде лесно до триумфот. Сафјулин, кој на турнирот настапува како квалификант и е рангиран на 132. место на АТП-листата, одигра одличен натпревар и во повеќе наврати сериозно го намачи седумкратниот шампион. Русинот во претходната рунда го елиминираше младиот бразилски талент Жоао Фонсека.
Првиот сет донесе вистинска драма. Ѓоковиќ прв стигна до брејк, но Сафјулин веднаш возврати. Србинот повторно го загуби сервисот во шестиот гем, но успеа да се врати, да спаси два сет-поени и по голема борба во тај-брејкот да поведе со 1:0 во сетови.
Во вториот сет двајцата сигурно ги освојуваа своите сервис-гемови сè до шестиот гем, кога Ѓоковиќ направи клучен брејк и рутински го приведе сетот до крај со 6:3.
Сафјулин не се предаде и во третиот сет повторно го подигна нивото на својата игра. Му го одзеде сервисот на Ѓоковиќ, а и покрај тоа што Србинот успеа да возврати со рибрејк, рускиот тенисер одигра уште подобро по медицинскиот тајм-аут поради болка во колкот. Со нов брејк поведе со 5:2 и го освои сетот, намалувајќи на 2:1.
Сепак, искуството на Ѓоковиќ дојде до израз во четвртиот сет. Со ран брејк ја презеде контролата врз натпреварот и без поголеми проблеми го приведе мечот до крај, обезбедувајќи место меѓу осумте најдобри на турнирот.
Во четвртфиналето, Ѓоковиќ ќе се сретне со победникот од дуелот меѓу Феликс Оже-Алиасим и Алехандро Давидович Фокина.
