Германската војска за прв пат процени дека заканата од руска саботажа насочена против нејзините војници и воени објекти е сериозна. Бундесверот ја крена заканата на второ највисоко ниво по откривањето на дрон со експлозив во близина на воената база Вунсторф во Долна Саксонија, пишуваат „Зидојче цајтунг“ и германскиот јавен радиодифузен сервис WDR.
Германското Министерство за одбрана потврди нова безбедносна проценка, која ги одразува растечките загрижености за руските хибридни операции на германска територија. „Проценуваме дека Бундесверот генерално е изложен на сериозна закана од саботажа“, изјави портпаролот на министерството.
Според интерен документ што го виделе германските новинари, руските активности повеќе не се насочени само кон попречување на помошта за Украина, туку би можеле да вклучуваат и директни напади врз германските воени објекти.
Дрон со експлозив пронајден во близина на воена база
Причината за зголемување на нивото на закана беше откривањето на дрон кон средината на септември во близина на воздухопловната база Вунсторф во Долна Саксонија.
Дронот случајно го пронашол земјоделец, а недалеку од леталото била пронајдена конзерва полна со моќен експлозив.
Според техничката анализа на германската федерална криминалистичка полиција, дронот веројатно лежел таму околу две години.
Истражителите се сомневаат дека намерата била да се нападнат авиони на Бундесверот. Дизајнот на авионот наликувал на дронот со експлозив што бил употребен во неуспешниот напад на аеродромот Лајпциг/Хале на почетокот на август.
Германија: Русија ја премина црвената линија
Во интерен воен документ се наведува дека руските активности ја преминале границата што германската војска претходно ја сметала за можна, но сè уште неостварена закана.
Според проценката на Бундесверот, Русија ја преминала „претходно предвидената црвена линија“ на намера за предизвикување физичка штета, вклучително и можни смртоносни последици, со употреба на дронови со експлозиви.
Германската војска верува дека Русија речиси сигурно имала капацитет да спроведува такви операции веќе некое време, а сега веројатно покажува поголема подготвеност да ги спроведува.
Иако инцидентот во Лајпциг беше оценет како индиректна закана за германската војска, случајот Вунсторф укажува на можноста дека Бундесверот бил директна цел.
Обид за напад врз украински товарен авион во Лајпциг
Германските власти минатиот месец ја обвинија Русија за обид за напад со беспилотни летала врз аеродромот Лајпциг/Хале во август. Беспилотно летало со експлозив беше пронајдено во близина на украински товарен авион „Антонов“, кој се користел за транспорт на воена опрема.
Тој аеродром е важен за логистичка поддршка на Украина и операциите на НАТО. Според проценката на германската војска, напаѓачите во Лајпциг имале намера да погодат цивилен товарен авион, додека дронот пронајден во близина на Вунсторф веројатно имал намера да нападне воени авиони. Русија ги отфрла обвинувањата дека стои зад саботажата во Германија.
Сомнителни дронови снимале германски воени објекти
Во документот, Бундесверот предупредува на голем број други инциденти што укажуваат на можно руско извидување на воени и инфраструктурни објекти.
Меѓу нив се и летови со беспилотни летала над локација поврзана со противракетниот систем „Ероу 3“ во Саксонија-Анхалт. Овој систем служи за пресретнување на балистички ракети на големи надморски височини и е дел од германската програма за зајакнување на противвоздушната и противракетната одбрана.
Германските служби, исто така, забележале камуфлирана камера што ја снима стратешки важната железничка станица во Минден, во сојузната покраина Северна Рајна-Вестфалија.
Истражителите се сомневаат дека ваквите активности се поврзани со собирање разузнавачки информации за можна идна саботажа.
Германија очекува нови обиди за саботажа
Германските разузнавачки служби предупредуваат дека безбедносната состојба може дополнително да се влоши на краток рок.
Според воената проценка, Русија веројатно се обидува да ја ослабне германската политичка и социјална поддршка за Украина и да ја попречи испораката на воена опрема и обуката на украинските војници. Министерството за одбрана најави дополнителни мерки за заштита на воените објекти.
Во зависност од проценката на нивото на закана на одредена локација, тие може да вклучуваат почести патроли од страна на стражарите, инсталација на инфрацрвени камери и дополнителни огради и системи за контрола на пристап до воените бази.
Германското предупредување доаѓа во време кога европските безбедносни служби сè повеќе предупредуваат за можна руска саботажа, сајбер напади, извидување со беспилотни летала и други форми на хибридна акција против членките на НАТО.
