Зависноста на Европската Унија од руските енергетски производи значително се намали, според Бен Меквилијамс, експерт за енергетика од тинк-тенкот „Бругел“ во Брисел. Ова се однесува најмногу на гасот, чиј увоз ЕУ го намали за три четвртини од почетокот на руската инвазија на Украина. Од почетокот на следната година, увозот на течен природен гас (LNG) ќе биде забранет, а од есен забраната ќе се прошири и на гас од цевководи, пишува Дојче Веле .
Сепак, сликата е посложена. Според извештајот „Russia Fossil Tracker“ од финскиот истражувачки центар CREA, 27-те земји-членки на ЕУ потрошиле околу 238 милијарди евра за руски јаглен, нафта и гас. Европратеничката Хана Гедин од шведската партија Vänsterpartiet вели дека Русија ги користи овие пари за финансирање на ракетни и беспилотни напади врз украинското население.
Европската комисија објави план за намалување на увозот на руска нафта на почетокот на годината, но сè уште не го презентирала. „Каде е ветениот закон? Каде е вашата храброст да им дадете пример на другите?“, праша Гедин во Европскиот парламент.
Некои членки на ЕУ, првенствено Унгарија и Словачка, продолжуваат да зависат од увозот на нафта од Русија преку нафтоводот „Дружба“. Ваквите зависности не можат брзо да се отстранат, но сепак уделот на руската нафта во вкупниот увоз на Европската Унија е значително намален.
Американската политика и ставот на Унијата
Дополнителни дебати се поттикнати од политиката на американската влада. Вашингтон прво склучи договор со Русија за снабдување со дизел, а потоа претседателот Доналд Трамп привремено ги суспендираше санкциите против рускиот режим кратко пред тие да стапат на сила.
„Би било лудо повторно да се купува енергија од Русија“, коментираше Бен Меквилијамс од Бругел.
Според него, политиката на Трамп кон Русија не треба да влијае на европската насока. Сличен став делат и мнозинството членови на Европскиот парламент. Социјалдемократот Јенс Гајер истакнува: „Ние сме зависни од земја која води војна и ова мора да заврши што е можно поскоро“.
