Едно лице загина, а се бараат три лица откако брод со мигранти потона рано утрово во близина на грчкиот остров Самос, потврди крајбрежната стража. Дваесет и шест мигранти успеаја да стигнат до брегот во областа Петалидес и да ги известат властите дека има и други во морето, пишува Euronews .
Веднаш беше започната масовна операција за пребарување и спасување, во која беа вклучени бродови на крајбрежната стража, хеликоптер, приватен брод и копнени екипи. Телото на една жена беше пронајдено за време на пребарувањето, додека операциите продолжуваат за пронаоѓање на три исчезнати лица. Националностите на мигрантите сè уште не се објавени.
Смртоносни премини преку Медитеранот
Грција е една од главните влезни точки во Европската Унија за мигранти и бегалци, со повеќе од еден милион регистрирани пристигнувања од 2015 година. Стотици луѓе загинаа обидувајќи се да го преминат морето.
Најновите податоци од Фронтекс, Европската агенција за гранична и крајбрежна стража, покажуваат дека нерегуларните миграциски текови низ Источниот Медитеран се намалиле за 30% во првите 11 месеци од 2025 година во споредба со истиот период во 2024 година. И покрај ова, околу 46.200 пристигнувања се регистрирани во грчките води оваа година.
