Над десет лица осомничени за нелегален увоз и дистрибуција на ботокс и филери, а меѓу приведените има дерматолози, вработени во болницата „8 Септември“, како и сопственици на приватни ординации.
Ова е епилогот од вчерашната акција спроведена по наредба на Обвинителството за организиран криминал.
Претреси се извршени на неколку локации, вклучувајќи ги и Скопје, Струмица и Битола.
Се сомнева дека оваа група набавувала медицински препарати на организиран начин без потребните дозволи и контроли, по што тие понатаму биле дистрибуирани и користени во естетски третмани.
Властите ги товарат осомничените за неколку кривични дела, вклучувајќи злосторничко здружување, примање мито и злоупотреба на права во областа на индустриската сопственост.
При претресите, запленета е голема количина медицински препарати, пари, мобилни телефони и луксузно возило.
Засега нема официјални информации дали спорните препарати биле користени кај пациенти, ниту дали има евентуални последици по нивното здравје.
Истрагата е во тек.
